بنات القصيم هم ٍ على القلب !!

[النمر الأسود]

اخواني الكرام ، أحبتي في الله

السلام عليكم ورحمة الله وبركاته ، تحية طيبة للجميع وبعد : ــ

( بودي أن اتطرق لحديث طالما كنت مترددا ً في الحديث عنه

ولكني استخرت الله وأسأكتب الموضوع هنا لعلمي أن الغالبية في هذا المنتدى

من منطقة القصيم وسوف يفيدونني بآرائهم السديدة بلا شك 0

اود ان اتطرق لفتيات القصيم وصعوبة الزواج منهن لأسباب كثيرة ،، مثلا ً في محافظة عنيزة أنا اسمع

كثيرا ً ان اهل عنيزة مو بالسهولة يزوجون الرجل لازم يحللون والديه

بعد ذلك يمكن أن يظفر بإحداهن او يمكن يقولون له : ــ

توكل على الله يا أخوي ما كتب الله لك نصيب !! :mad:

اخواني معليش لا أحد منكم يفهمني غلط أو يأخذ بخاطره علي ممكن انا مبالغ

فيما قلته أو الناس مبالغين في قولهم وكلامهم لي 00

لكن يبدوا أن الأمر فيه الكثير من الصحة والصدق ،، فعلا ً لا حظت أهل

عنيزة مستحيل يزوجون الرجل اذا كان متزوج وله زوجة ثانية والله لو يملك

مال قارون ولو هو ملياردير مستحيل يزوجونه لا أعلم ما السبب ؟!! :confused:

عكس بريدة تماما ً ،، أهل بريدة لو الرجل متزوج ثلاث عادي يزوجونه الرابعه

صغيرة وبكر بعد !!

أنا اعرف زميل لي رجل ملتزم وطيب ولا أزكي على الله أحدا ً المسكين تغربل

عجز يتزوج من بنات عنيزة !!

سألته لماذا ؟؟

فقال لي : ــ يا أخوي والله عجزت كل مقومات الزواج أملكها الحمد لله دين

ومال وصحة وشباب ووسامة ،، لكن الظاهر شروطهم شوي تغربل الواحد !!

يعني : ــ يركزون على سالفة الدراهم والمناصب وكم راتبك وما إلى ذلك من الأمور

المادية أكثر من تركيزهم على دين وأخلاق الرجل المتقدم !!

فقلت له : ــ غير صحيح هذا الكلام وانت مبالغ جدا ً فيما قلته أو إنك طحت بناس

همهم اللي بجيبك وبس ،، ثم قلت له : ــ

يا أخي بالعكس الناس الآن يشرون الرجل ما يبون منه إلا التعامل الطيب والكرم

مع بنتهم 0

فقال لي : ــ يا أخوي لفيت عنيزة كلها كلهم نفس النمط والنمونة !!

حقيقة ً لا أعلم ماذا أقول فلقد سألت أكابر أهالي عنيزة فقالوا لي

نفس ما قاله هذا الرجل وأكدوا لي أن الزواج من عنيزة صعب جدا ً

فقلت طيب : ــ ليش هل الفتيات يشترطن شروط عسيرة وتثقل كاهل الرجل

أم ماذا هناك بالضبط ؟ !!

أفيدوني بارك الله فيكم


أمّا منطقة بريدة : ــ

فهم فعلا ً يريحون الخاطب بشكل كبير وتجدهم يركزون على دين واخلاق الرجل ولا تهمهم الأمور المادية

فأهل بريدة لا حظت فيهم لو أن المتقدم والخاطب متزوج بأكثر من واحدة تلقاهم عادي يزوجونه بنت صغيرة وبكر بعد

فحقيقة ً أهل بريدة أجد فيهم الرغبة الجادة في تسهيل وتيسير الزواج لدى المتقدم والخاطب فيحاولون قدر المستطاع

كسبه وإرضائه ،، فوالله وجدت فيهم خصال حميدة وطيبة جدا ً ولا حظت معظم أهالي بريدة يساعدون الخاطب

على زواجه ويسهلون أموره ويشرون الرجل وما لجنة تيسير الزواج في محافظة بريدة إلا ّ اكبر دليل على مساعدة

الشباب على الزواج جزاهم الله كل خير وجعل ما يعملونه في موازيين حسناتهم ،، كل ما أود أن اتكلم عنه في الموضوع

أننا رغم كل هذا التسهيلات للمقدمين على الزواج إلا ّ اننا نلاحظ وبشكل ملحوظ وخاصة ً في الآونه الأخيرة صعوبة

الزواج من فتيات القصيم وتزداد الصعوبة أكثر في تصرفات أهل بعض المحافظات التي كأنهم يتعمدون عرقلة وتعقيد

الخاطب إذا أتى إليهم راغبا ً اكمال نصف دينه ،، قليل جدا ً من يطبق قول النبي محمد صلى الله عليه وسلم : ـــ

( من أتاكم من ترضون دينه وخلقه فزوجوه ) 0

لاحظت فعلا ً تناقضات عجيبة في مسألة الزواج في القصيم فهناك المتشدد والمعرقل وهناك المعين والميسر

سؤال يطرح نفسه يبحث عن إجابة شافية وكافية ووافية : ــ

لماذا نجد صعوبة في الزواج والأقتران من فتيات القصيم ،، بينما نجد في المدن الأخرى تسهيل وتيسير أمور الخاطب

وترغيبة جديا ً بالزواج ؟؟

هل أنا مبالغ فيما قلته ؟!

أم هناك شي من الصواب ؟؟

آرائكم تهمنا وتفيدنا ،، وأخيرا ً وليس أخرا ً إختلاف الرأي لا يفسد للود قضية

ورجاء خاص لا أحد يأخذ بخاطره علي تكفون ،، ترانا أخوان وتهمنا

مصلحتنا جميعا ً ) 0

[بنت الشيحية]

من قال؟!

باالعكس أنا أشوف أن القصمان هم أكثر ناس يتساهلون بالزواج طبعا

بعد أن يرضونه ديناً وخلقاً ومالاً

اما المعوقات التي ذكرتها في مسألة الزواج سواء من متزوج أو غيره

نجدها في كافة الناس بغض النظر عن قصيمي أو غيره

هي فقط تعتمد على الرأي الشخصي وحسب مستوى التفكير

بالنسبه للتركيز في مسألة الزواج من شاب ذا مال

فأعتقد هاذا شئ طبيعي من الأهل والفتاة نفسها أن تهتم به طبعا مع حسن الأخلاق

والا لايجتمع مال وسوء خلق:confused:

لأن الحياة اليوم صعبه وتكاليفها أصعب لذلك من حق الفتاه واهلها اختيار رجل

ذا مال وليس بالضروره ان يكون تاجرا وانما ان تستطيع ان تعيش معه بدون جهد وتعب

من وجهة نظري الخاصه لااهتم بالمال بقدر الأخلاق يعني ان وجد خلق ولو مال يسير

لابأس!

وبالنسبه لتساؤلك
لماذا نجد صعوبة في الزواج والأقتران من فتيات القصيم ،، بينما نجد في المدن الأخرى تسهيل وتيسير أمور الخاطب

أبدا بالنسبه لي أرى مثل ذلك بل العكس في مجتمعي اسمع بتسارع عداد الزواج بشكل كبير

وطريقه جدا مريحه وسهله ويسيره

[نوف]

انا وحده ماتعجبني تصرفات اهل بريده بالزواج :) يشجعون الي مافكر بالزواج انه يتزوج
طبعا مو الكل ولكن الغالب .. والزواج فعلا ميسرينه ومسهلينه بشكل مو طبيعي
:(

.. لاطريقة اهل بريده صح ولا تصرف اهل عنيزه صح .. خير الامور اوسطها

.. كثير اسر تشتت صراحه من تسهيل الزواج .. مو ان الله حلل لك الزواج بس لانك تملك مال وصحه .. ( وهذي يشطح فيها كثير من الرجال .. ياارض تهدي ماعليك أدي ) وانك بتلقى المواصفات الي تبي لو هو عاشر مره زواج :( ... المفروض الي يبي يتزوج يعرف انه مو اكون اسره جديده .. تكون على انقاض اسره قديمه .. الي اقصده .. اذا ودك تزوج .. حافظ على زواجك الاول .. وخذ بخاطر الاولى على شان ربي يوفقك .. مو تدمرها المسكينه من كل ناحيه .. نفسيا واجتماعيا ..


.. من وجهة نظري .. ان بنات بريده مظلومات اكثر من غيرهن من بنات القصيم :) .. على الاقل تتزوج الوحده من غير بريده وهي مطمئنه نوعا ما .. بنات بريده من اولها خايفات وعلى اعصابهن .. ( بشكل عام المستقبل مااحد يدري عنه .. لكن احس بنات بريده مظلومات )

.. لي قريبات .. الي متزوجه من عنيزه نوعا ما مستقره .. الي متزوجه من بريده .. فيه خوف
على زواجها واسرتها بشكل عام ..

.. طبعا مافيه تعميم .. يعني فيه من الرجال من بريده يسوون الف رجل ..



.. شكلي طلعت عن الموضوع :) بس كلامك حرك فيني اشياء كثيره



تحياتي

[حلم العالم]

أخي الغآلي ، من المعلوم الن الزوآج قسمة ونصيب واللي مكتوب له نصيب بيآخذه ، لكن من نآحية

مقآرنة تسهيل الزوآج بين أهل بريدة وأهل عنيزة؟ فهذآ الشيء يرجع إلى أهل الفتآة نفسهآ ومدى

تمسّكهم بعآدآتهم وتقآليدهم ، فمن المعروف غآلباً عند بعض الأسر المتشدّدّه في الدين أنّهم يُسآرعون

بتزويج بنتهم من الرجل الذي يرون انّه ملتزم بغض النظر عن مآله وحآلته المآدّيّه بشكل عآم وحتّى لو

كآن متزوّج من ثنتين أو ثلآث وقد لآ يتأمّلون في عوآقب تلك الزيجة:confused: ، وفي الغآلب أن

أكثرنآ لآ يرضى أن تتزوّج أخته من رجل متزوّج خصوصاً إذآ كآنت اخته لم يسبق لهآ الزوآج ولآزآلت

صغيرة ، ومن جهة ثآنية قد يكون تسآؤلآتك عن أهل عنيزة وعدم تسهيلهم للزوآج ، قد يكون عآئد إلى

طبيعة أهل عنيزة ومدى انفتآحيّتهم المفرطة نوعاً مآ ، فهم في الغآلب لآ يريدون إلا من طبقتهم ومن

مستوآهم الأجتمآعي مغفلين في ذلك جآنب الدين بشكل أكبر ولا أعمّم على ذلك ..

وكذلك الحرص على التزويج المبكّر للولد من بآب التشدّد في الدين والزعم على حمآيته من الفتنه؟

فهذآ ليس عذراً ، لو أن كل شخص بمجرّد بلوغه زوّجنآه حمآيةً له من الفتنه لأصبح مجتمعنآ ينآفس

أعدآد المجتمعآت كلّهآ ، وتزيد المشآكل ،

أعرف شخص زوّجه وآلده وعمره 17 سنه (( في وقتنآ الحآضر)) ، لكونه التزم في بدآية حيآته ولكن

لم تدوم علآقته الا وأصبحت المشآكل تزدآد عليه ، فلعلينآ تحكيم العقل في هذآ الجآنب ..

وفي النهآية مثل مآقآلت أختي نوف خير الأمور الوسط لآ إفرآط ولا تفريط ، وعسى الله يرزقنآ وإيآكم

الزوجآت الصآلحآت والأزوآج الصآلحين ، ويديم علينآ وعليكم السعآده في دنيآنآ وأخرآنآ ، ودمتم بخير..



تقبّل تحيّآتي



حلم العآلم

[شريم]

ألا مبالغ وخويك يبالغ بعد .. واسمح لي يافهد أشم في موضوعك هذا عنصرية كريهة

اجل تقول خويك طق على أهل عنيزه كلهم ومازوجوه .!! :confused:

معنى كلامك ان خويك فيه سبب وهو اللي خلاهم يرفضونه

الصراحة يافهد وبدون زعل .. ليتك مستخير قبل تكتب هالموضوع

[النمر الأسود]

والصراحه بدون زعل يا شريم ليتك مستخير قبل لا ترد

لا يوجد عنصرية ولا تلميح لعنصرية ، يبدوا أنك ذهبت بفكرك بعيدا ً

عن لب والمقصد من الموضوع 0

والرجل اللي ذكرته في الموضوع رفضوه مو علشان فيه خلل أو عيب كبير

لا رفضوه علشان الناس هاليومين ما يبون الملتزم 0

[شمـ بريدة ـوخ]

اصابع يدك مب واحد
كذالك الناس مب واحد منهم المتساهل ومنهم المتشدد بكل مدينه وبكل منطقه
هناك من يهمه المال وهناك من يهمه الدين والخلق ........
فقد ذكرت في موضوعك أن اهل بريده يزوجون بنتهم بكل سهوله حتى لو كان متزوج هذا من وجهت نظري غير صحيح بحكم اني اتواجد بنفس المنطقه ... الفتاة هي من تحدد هل تتزوج فلان اولا ليس اهلها وانا اتكلم عن مجتمعي .. عندما يتقدم لها فلان يذكر لها مساؤه ومحاسنه وماذا قال لهم الناس عنه فإذا اعجبها وافقت وإذا لم يعجبها لاتغصب ...
وعندنا الفتيات الاغلبيه لايرضين بمتزوج او حتى مطلق حتى لو مهما كانت الاسباب .. وانا واحده منهن!!
وبالنسبه لعدم سهولة الزواج هذا يحصل من عدم وجود الزوج الكفء .. فإذا تقدم من هو صاحب مال قد يكون مقصر بدينه وإذا كان ملتزم تجده عصبي المزاج (طبعه حار) وهذا نادرا ماتستمر الحياة معه لعصبيته او يكون دخله قليل جدا....... وإذا كان إلتزامه مقبول وعارف دينه نجده مدخن وهكذا دواليك ........ فلذالك يجد عزوف الناس عنه لسبب ماء في نفسه قد لايعلمه هو ولكن يكون معروف عند الناس

فلذالك قبل ان يتقدم الشخص اتمنى ان ينظر في نفسه هل هو كفء او لا قبل ان يتقدم ثم يرفض ثم ياتي ويقول انهم متشددون ولا يزوجون بسهوله .........

سوف أعطيك نماذج حصلت في الواقع :
-هناك من تقدم لاحد قريباتي وبعد السؤال عنه الكل مدحه والكل اثنى عليه لكن بعد مضي بعض الوقت على السؤال والبحث وجود انه عاق بوالديه ..... وانا اباه قد اشتكاه بل ان اباه هو من اخبر عن ابنه <<< هل يزوج هذا ؟؟؟؟؟ !!!!! ..
- هناك اخر تقدم لإحداهن وكان يملك اكبر المراكز وذو مناصب وذو دين ولكن بعد البحث وجدى انا به مرض نفسي يصيبه بالصرع يأكل على اثره بعض الادويه ..... بل من بجاحتهم انهم اخفو الامر على اهل البنت ولكن الله لهم بالمرصاد <<<< وهل يزوج هذا ؟؟؟؟؟؟؟؟!!!!!

- هناك واحد اخر قالو انه خريج جامعه وله وظيفه ممتازه ودخل ممتاز والتزامه مقبول بعد البحث والتحري وجد انه شاب مغازل حيث انه يشتغل باحد المحلات

وهناك نماذج لاتعد ولاتحصى ........... وهذه النماذج حصلت لقريباتي لم اتي بها من نسج الخيال
فلذالك لينظر الشخص لنفسه بمنظار الناس الذين حوله قبل التقدم لاينظر بمنظار نفسه لانه يرى انه كامل ولابه عيوب .. ويصلح ماينظر به الناس انه نقص بنفسه .. وعلى اثر ذالك يتقدم بكل ثقه ويثق بانه سوف يزوج من اول خطبه

.

[الناسي]

الإخوة الأفاضل
السلام عليكم ورحمة الله وبركاته ..
تابعت الموضوع واطلعت على الردود تباعاً ..
الموضوع جيد .. ومفيد .. والحوارات منطقية ..
أرجو ألا نفسد محتوى الموضوع وهدفه وننحرف به عن مساره ..
يجب أن نحسن الظن بالكاتب .. وأيضا بالمشارك والمحاور ..
الرجل يطرح ماسمع ... وهذا لايعني التسليم بكل ماقيل ..
لكل منا حق الإعتراض وإبداء الرأي كمحاور لكن بدون طعن في القصد ...
أرجو أن نبتعد عن الكلمات الغير مقبوله ونلتزم الحوار الهادف ..
نريد الإستفادة فلا تضيعوا علينا تلك الفرصة ...

شكرا لك فهد على هذا الطرح ..
وشكراً لكل من ساهم وشارك في الرأي ..
لكم كل الود ..
:) :)

[النمر الأسود]

الأخت الفاضلة ( شموخ بريدة ) : ـــ

( شكرا ً لك على المرور والتعقيب ، لكن أجد في ردك نوع من الإجحاف وعدم الإنصاف

في حق كل رجل يريد الزواج ، حقيقة ً إذا كان المتزوج لا يزوجه أحد والمطلق أيضا ً

لا يزوجه أحد والعازب لا يزوجه أحد بحجة أنه فيه كذا وكذا في هذه الحال إذا ً لا يتزوج أحد

إطلاقا ً وتكثر العنوسة ويكثر عدد عدم الراغبين في الزواج إذا كانت كل هذه المعوقات تفرضها

المرأة بحجة أن كل الذين تقدموا لها لم تعجب بأحدهم لأنها تريد رجل كامل الخلقة والأخلاق وهذا

محال لأنه لا يوجد إلا ّ في الجنة فقط ، ثم أدو أن أتطرق لنقطة مهمة ذكرتيها شموخ بريدة

ألا وهي أنك في مجمل ردك هناك تلميح غير مباشر بكمال المرأة وانها هي الصح والرجل هو

الناقص ودائما ً يكون رد الخاطب عيب في الرجل ! لما لا يكون العكس لما لا يكون المرأة

هي نفسها من تضع العراقيل للخاطب بحجج واهية ما أنزل الله بها من سلطان ، هذا هو رأي

واختلاف الرأي لا يفسد للود قضية وفي النهاية نحن هنا أسرة وعائلة واحدة متماسكة مهما

اختلفنا في الآراء ومهما زادت حدة الإختلاف إلا ّ اننا في نهاية المطاف نحن أخوة في الله

ومتحابين في الله ) وشكرا ً لك 0


أخي العزيز والفاضل ( الناسي ) : ــ

( شكرا ً لك عزيزي فوالله ردك هو عين الصواب وعين العقل والمنطق بارك الله فيك وسدد

خطاك وجزاك الله كل خير ) 0

شكرا ً للجميع

أخوكم في الله ( فهد )

10 / 5 / 1427 هــ

[شمـ بريدة ـوخ]

إذا كان المتزوج لا يزوجه أحد والمطلق أيضا ً
لا يزوجه أحد والعازب لا يزوجه أحد بحجة أنه فيه كذا وكذا في هذه الحال إذا ً لا يتزوج أحد
إطلاقا ً

اخي الكريم انا قلت إنا الاغلبيه من الفتيات لايرضين بالمتزوج والمطلق لم اقل جميعهن وهذا يثبت إنا هناك امكانيه .. ولكن مالذي يكبد الفتاة تحمل المشاكل بتزوجها بمتزوج او مطلق .. فإذا كانت هي الزوجه الثانيه او الثالثه فل تتوقع ان المشاكل سوف تنصب عليها من كل جانب وبهذا تم الاجحاف عن هذا النوع من الرجال
اما العازب فانا قلت انه قد يكون غير كفء فلذالك لايزوج او لايتسهل امر تزويجه وهذا جوابي على سؤال .. لماذا يصعب الزواج من تلك المناطق
........
وردي السابق هو جواب على تساؤلك لماذا لايزوج هذا الصنف من الشباب
اما الصنف الاخر فنحن نعرف كفاءته ونعرف لماذا امكنه الزواج لذالك استثنيت ذكرهم في ردي وهاؤلا كثر ولله الحمد
اما استثنائي لذكر المرأة وعيوبها لان الطرح كان عن الرجال لماذا لايزوجون وليس عن المرأة !!!
وإلا المرأة لم تكن ملاك ولذالك فهي تحمل من العيوب مايحمله الرجل
ولكن الرجل هو الباحث عن المرأة وهو الذي يطرق بابها لذالك يتم النظر لعيوب الرجل بغض النظر عن عيوب المرأة لانه هو استرضى هذه العيوب وتقدم لها
وبرجوعنا لمحور الحديث نجد ان المتقدم قد يكون به من العيوب مالايسرضيه الناس فلذالك يحصل الرفض
وقد يكون هو يرى نفسه انه لايوجد به عيوب فهوعنده مال وخلق ووسامه ..الخ ولكن الناس يرون شيء اخر لذالك هو يسأل لماذا لاأزوج
وليس هناك تشدد في منطقه وتراخي في منطقه اخرى إنما الموضوع مرتبط بالمتقدم نفسه
.

[الشاعره]

فهد قلت الواقع ..
ماقلته عما يتبعه أهل بريده في تزويج بناتهم ...صحيح
وما ذكرت عما يتبعه اهل عنيزة في تزويج بناتهم أيضا صحيح ..
لماذا نغالط انفسنا ..وهذا واقع وملموس ..
أهل بريده .. بطبيعتهم سهلين ومرنين بسيطين لا يتشرطون ...وكون الرجل متزوج هذا آخر ما يفكرون به .. بل ان لي صديقه صغيره بالسن وجميله ولم يسبق لها الزواج تزوجت برجل متزوج وهذا برغبتها هي ..

أهل عنيزه .. برغم تقارب المدينتين الا انهم يختلفون اختلاف جذري عن بريده .. فهم شديدين بشروطهم ولا يزوجون بسهوله ابدا .. تهمهم بالدرجه الأولى هو أبن من ..؟؟!! وبالفعل لا يزوجون المتزوج أبدا !! ويعيدون حساباتهم كثيرا قبل الموافقه .. تهمهم العائله والمركز ..

ولكن اختلف معك في ما قلت ان الناس الآن يبتعدون عن تزويج الملتزم ... لا يا أخي بل يبحثون عنه ..وهم كثر ولله الحمد ..


كل التحايا لك فهد على طرحك ..

وسلامي للجميع هنا وعلى راسهم مشرفنا القدير (الناسي )

الشـــــــاعره

[شريم]

الإخوة الأفاضل
السلام عليكم ورحمة الله وبركاته ..
تابعت الموضوع واطلعت على الردود تباعاً ..
الموضوع جيد .. ومفيد .. والحوارات منطقية ..
أرجو ألا نفسد محتوى الموضوع وهدفه وننحرف به عن مساره ..
يجب أن نحسن الظن بالكاتب .. وأيضا بالمشارك والمحاور ..
الرجل يطرح ماسمع ... وهذا لايعني التسليم بكل ماقيل ..
لكل منا حق الإعتراض وإبداء الرأي كمحاور لكن بدون طعن في القصد ...
أرجو أن نبتعد عن الكلمات الغير مقبوله ونلتزم الحوار الهادف ..
نريد الإستفادة فلا تضيعوا علينا تلك الفرصة ...

شكرا لك فهد على هذا الطرح ..
وشكراً لكل من ساهم وشارك في الرأي ..
لكم كل الود ..
:) :)




مشرفنا القدير الناسي

اختلاف الرأي لا يفسد للود قضية .. نحن هنا نتحاور ونختلف ونتفق

ولكن ألا تتفق معي بأن العنوان في وادي والموضوع في وادي أخر ؟

وأيضا لو كان الكلام على وجه العموم أفضل من تخصيص مناطق بذاتها ؟؟

[Abosmsm]

السلام على الجميع .........أنا أقول الزين والشين موجود................................................ولاكن أقترح عدم ذكرأسماء تجنبآلأي عصبيه

[جـــــراح]

.



الاخ العزيز النمر الاسود :

قد يكون التعميم قد نال من جدارة المطروح فلا كل أهل بريدة ولا كل أهل عنيزة .

المتعارف عليه أن التعدد موجود في مدينة بريدة كما في محافظة عنيزة وقد تختلف النسبة إما بعدد السكان واحد إلى خمسة أو أن بريدة لم تعد تلك المدينة ذات الهوية الواحدة فهي مدينة جاذبة للعديد من أهل القرى والبادية وحتى من المحافظة المجاورة فيصبح وصف موضوع محدد تختص به شيء من الصعوبة .

بالنهاية كل يرى ويقرر مايصلح لبناته مع الاخذ بالاعتبار تقارب المستويات المالية وإن شئت وبعيداً عن التنظير المستويات الاجتماعية أيضاً .

شكراً لك .

تحياتي .

[ابوالسواليف]

أخي الكريم :

أقول لك من تجربة شخصية :
زوجت أثنتان من بناتي ، الاولى تزوجها رجل من شمال المملكةوأصله من (القصيم )
والثانيه تزوجها رجل من بريده . كأب أجد أنه من المناسب القول أن لامصلحة في
مثل هذا القول أي كأنك تقول أن أخواننا في عنبزة لايزوجون الا بعد تدقيق وتمحيص
ومعرفة كل المعلومات عن الخاطب أصله وفصله ووضعه الاجتماعي .........الخ .
وأن أهل بريده لايبالون بذلك فكل همهم تزويج بناتهم بشكل متسرع غير مبالين
بمصلحة البنت ... بغض النظر عن من قال هذا الكلام أو من نقله لك فالامر
أصبح بعيدا عن الواقع .. نحن مجتمع مترابط نأخذ الامور ببساطتها بعيدا
عن التكلف والمبالغة في كل شئ .. بعيدا أيضا عن سوء الظن بمن
يدخل بيوتنا .. ومن هذا المنطلق أجدها فرصة با القول ان اهل
بريدة بسطاء جدا في تعاملهم مع نظرائهم أو حتى الغرباء
أما مسألة ( العتصريه ) فأرجوكم جميعا الابتعاد فعلا
عن هذه الكلمة التي شتتت ترابطنا الاجتماعي .
كأب ومن بريده أنا صعب جدا جدا في أختيار زوج ابنتي من كل النواحي
التي يجب السؤال عنها دينيا واجتماعيا.. ولكني بالمقابل سهل جدا جدا في
أختيار الرجل المناسب لأبنتي حتى لوكان لديه 3 نساء . المسألة تتعلق
بمعاملته للمرأة / دينه/كرمه/اخلاقه/تعامله/تواصله/ صلته للرحم/ حبه
الشديد لأهله/ تعلقه الشديد بتكريمه ورحمته من هي بذمته .. هذه الامور
هي التي يجب البحث عنها في بريده أو عنيزه أو في مدينة .
ياترى ... هل تجدني الآن من هنا أم ..... من هناك ؟؟

[رايقة]

يازين اهل الرس ياحبي لهم بس...

ملاحظه:الاختلاف لايفسدللود قضيه...

وحدر جبل ولا تحدر طبعhttp://smilies.sofrayt.com/fsc/sunglasses2.gifع

[عيـون * الفجـر]

كلام منطقي جدا

إحتمال يكون فيه نوع من المبالغة

لكن انا أشوف الفرق الشاسع بين أهل بريدة وعنيزة مثل ماقالت أختي الشاعرة
خصوصا في مسألة الزواج ...
وهذا انا لمسته بالفترة خطبتنا لأخوي ... وشفت شروط أهل بريدة وشروط عنيزة ..!


أكثر من بنت من بريدة عمره صغير وتزوجت رجل متزوج ... حتى تلقاه لامنصب ولا مال بس لخلق ودين ..
أهل بريدة بطبيعتهم متساهلين بمسألة الحالة الإجتماعيه للخاطب.. ومستعجلين بتزويج بناتهم ليه مدري ..!
لكن ماأنكر إنه فيه بعد من اهل بريدة ناس شديدين بمسألة تزويج بناتهم بس حنا نتكلم عن الأغلبية ... !


وفي النهاية ... الزواج قسمة ونصيب ... ولازم الواحد يتثبت قبل لايسوي أي شي ... لان المسألة مب مسألة خذني جيتك ...

[محمد آل محمد]

السلام عليكم
جئت لأداخل الجميع في الموضوع رأيت ان الموضوع قد اخذ ما يكفيه من الرد من وجهة نظري

[هواي نجدي]

أول شي اسمح لي ارد و اقول اللي بقلبي و اتكلم بكل شفافية

و ان كان ردي ما يعجبكم احذفوة المسألة مسألة أمانه و شي حقيقي صار


أو شي بقولك أني برد عليك بشكل جدا هاااااادئ

و لا تتوقع تكبير الأحرف معناته أني قاعده أصرخ عليك !! لا بالعكس

بس بكتبه كبييييييييير أبي اللي ما شاف يشوف و اللي ماحس يحس بنا

و أبي اللي يقول ان القصمان أو النجديين عموما شايفين أنفسهم يقرا ولا يزعل


أنا ماني قصيمية ... أمي قصيمية و من عنيزة من أكبر أكبر بيوت عنيزة
و بقولك مو بس قصتها لاااااا بقولك قصتها و قصة خواتها

أرجــــــــوك أسمعني شوي,,,,,,,,
أمي بنت ناس و مو لأنها أمي أٌول كذا
لكنها بنت شيوخ من القصيم معروف أبوها و ان عنده بنات و من هالكلام

عاد بنته الكبيرة زوجها واحد ماهو من جماعتنا
ومو بس كذا الا فقير و بالجيش رغم ذلك زوجها اياه
و هي صغيرة و ماكان عنده غيرها ذاك الوقت
و مو فقير و مكرمها الا فقير و ايدة طويلة يضربها
و جدي ( اللي من عنيزة ) ماكان يقول شي يردها لبيت زوجها و يقول لها احترميه
و الله يرحمها عاشت و خلفت و ( ماتت عنده )

خالتي الثانية زوجها ( راعــــــــــــــي غنــــــــــم ) !!

أي نعم بنت أحد أكبر عوائل عنيزة زوج بنته اللي عمرها 17 سنة فقط لراعي غنم عمرة 50 سنة !!!

و أبشرك يضربها و يظلمها و ( هــــــــي اللي تصرف عليه !!! )لا و مو بس كذا !!!!!!!

إلا عقيم و ما يجيب عيال !!! و بالقوة جابت اثنين بعد العلاجات الغالية اللي هي من جيبها دفعتها !!!



بجي أسولف عن أمي و آآآآآه يا يمه أمي تزوجت ما هو من القصيم بس من الجماعه

شاب حدا رجليه معوقة ,,, أسنانه تركيب ,,,, ما معاه الا ثاني متوسط ,,,,, أمة أجنبيه ,,,, فقير ,,,,,,, راتبه 1500 ريال بشركة أجنبيه ,,,,,عايش عيشة الله يعلم بها .. شلل و أصحاب و سفر للخارج تاريخه مجيد !!
و اللي شفع له عند جدي أنه أعلن التوبه و قال ان ماعندي احد و امي و هالسوالف و ......

وزوجة جدي العنيزاوي !! اللي ما يزوجون أحد >>>>>>>>>> خذ بالك !!!!!!!!

أي نعم زوجة أمي بنت صغيرة عمرة 16 سنة و يوم توظفت بعد الثانوي
أخذ زوجها راتبها و جت لأبوها هي و زوجها و قالت له : ( يبا زوجي يبي ياخذ قروشي )
قام جدي سأل : ( وين القروش ؟) و عطته أمي قروشها بربطتهن قام جدي تدري وش سوى ؟؟؟؟ ضرب بالقروش بوجه أمي و قال : تهاوشتوا عشان قروش ؟؟
و من يومها وزوجها ياخذ راتب امي و هي ساكته

و الله يرحمزوجها أنتكس بعد الزواج و رجع أسوأ ,,,, لا و صار عقيم !!!
لكن أمي بنت الرجال ماعلمت أحد و سترت عليه

قامت قالت يمكن لأن ماعنده بيت و باعت ذهباها وعمرت له بيت
و راحت القصيم تزور اهله
يوم رجعت لقت زوجها يصيح و يقول رهنته و أخذوا البيت !!!!!!!!! و عطوني بس مية ألف !!!!!!!
سكتت أمي و تسلفت و سوت بيت ثاني و نفس الحركة سواها !!!!!!!!!(هذا اللي اعرفه )
لكن و سبحان لله فجأة تغير و صار ما في احسن منه
إلتزم و سلم على راس أمي و هو يبكي و قال خلاص يا ..... انا و هالمسجد أخوان و راح اعوضتس و اترك الفساد اللي تعلمته من خوالي ( امه اجنبيه )
أستبشرت أمي و فرحت و من الفرحة تسلفت فلوس فوق طاقتها و عمرت فله تبينا نرجع مثل أول و لكن ....... مات بعد ثلاث شهور و انا عمري سنتين و اهل زوجها نكروا بيتها و أخذوه منها !!!!!!!!
يوم التزم و تعدل مات الله يرحمة و يسكنه جنات النعيم ... يارب تقبله و اغفر له و لو اني ماعشت معه ولا اعرفة بس اسمع عنه قصص
و تصبر بنت الرجال طاحت بالديون
قامت امي و تزوجت ثاني سبحان الله !!! نفس المواصفات السابقة !!!الفرق انه ماهو من نجد !!!
عاد الأخ الجديد متعقد من شي اسمه ( أهل المنطقة الوسطى ) !!
و قالها بوجهها أنا أخذتك عشان أذلك !!!
و ذلها و هانها حط حرته بأمي و يضربها
يقول لها يالنجدية انتم بطرانين ( أثرياء ) سوي لي مشروع !!
أوووووووول مرة أدري ان الدولة تصرف شيكات لأهل نجد !!!! اذا كان كذا وناسة و الله
و احنا كنا مستغربين ليش امي تتسلف ؟ ووين تروح فلوسها طيب ؟

وين المشكلة ؟؟

المشكلة انه كان يعذبها و احنا ماندري!!
لأنه قدامنا يصير ملاك ( خايف من أخوي الكبير اذا طلع و البنات راحوا يسوي نذالته مع امي !! ) و يصير طيب طيبة مالها حدود بس كنا نشك فيه !! و نشك بأمي اللي ذبلت و قطعها عن اهلها !!
و مات اللهم يا كافي بمرض وراثي من عايلته .. اللهم ارحمنا اذا متنا


عاد قصتنا بكتبها ان شاء الله مع هالرجال و عنصريته اللا معروف أسبابها ضد ناس
اعترف هو انه ما يعرف ولا احد منهم آذاه بس مجرد غيرة !!!!
قالها بلسانه على سرير المرض يوم سألوه ليش سوا كذا ؟.؟ ما هو مسلم و يسمع الرسول يقول : ( دعوها فإنها منتنه ) في ما معناه ؟؟بس بكتب القصةبعدين


لا تقولون لي هذا ايام اول بس عطوني الضوء الأخضر عشان اكتب قصص بنات خالاتي !!!!!!! بهالزمن بنات اليوم و الدلع !!!!!!و اذا كان هالكلام يبرد قلوب البعض بقولها !! انا سمعت عن قصيمية بجيل امي تزوجت ,,,,,,, ألماني مسلم !! و العهدة على الراوي !!!


اللي ابي اقوله كثييييييييييييييييييييييييرو قلبي ملياااااااااااااااااااااااااااان

بس احب اقولكم ان كللللللللل اللي اعرفهم من عنيزة و بريدة و الرس و غيرها من قصيمنا الغالية يزوجون بناتهم!! نعم يزوجون لأي أحد و هنا المشكلة اللي خلت اللي يتزوج يحسبهم خدامات ابوة

يقولون بذا في الحجاز ( اللي ياخذ من غير ملته تزيد علته ) و هالمثل صادق مليون بالمية

ياخي وش معنى قصيمية ؟؟؟ وش معنى من عنيزة ؟؟؟ لا مؤاخذه الزواج بالطيب مو بالغصب ؟!!
يمكن هم ما يزوجون الا عيال عمهم ؟؟؟حرية شخصية !!
بعدين السعودية و لله الحمد قارة من كبرها اللي ما تلقاه هناك تلقاه بمكان ثاني ياخوي !!

و بعدين اذا القصمان يبيون فلوس و منصب ليش القصيم للحين مزارع ؟؟ و بيوت بسيطة ؟؟ وين القروش اللي يقولون عنه ؟؟؟

و بعدين وش معنى القصيم؟؟ هذولي أعرق قبايل المملكة شفتهم هنا بالطايف امثال قريش و الاشراف و العتبان ما يزوجون الا من بعضهم وشي حلو ( وان كنت بالسابق استنكرة بس بعد ما شفت قلت هم صادقين ) و عايشين على كذا و محد اعترض على حريتهم الشخصية

ووين اللي قولون ما يزوجون ؟؟؟ الا يزوجون !!! و قصة امي و اخواتها و بنات عمانها الــ 12 و غيرهم و غيرهم شاهدة

و ما انكر ان كان فيه رفض !!و ما انكر ان كان بعضهم ينكر ربما للأسباب اللي يقول عليها الكاتب !!! بس رجاء لا تعمم و ان كانوا كذا ياخي احرار قالوا لك لأ شف غيرهم ! !!
الا شف من عايلتك أنت !!!معقوله انتهوا البنات ؟؟؟؟؟؟؟

اغلب الطلاق يصير بالسنة الاولى لأن الزوجين جديدين على بعض
لو انهم عيال عايلة وحدة ما صار كذا صح ولا لا؟؟؟؟؟

بس بعض الناس حاط القصيم لا مؤاخذه حاطينها شام المملكة ياخذون ينات حمايل خدومات مخلصات و يقطعونهم عن اهلهم يحسبونهم بيسكتن... انا هنا و اشوف قصيميات و نجديات عموما واااااااااجد يصيحون على اهلهم وودهم يشوفونهم و يقولون لهم بعدين !!! ليش من البوسنة و الهرسك ماخذها مالها اهل تشوفوهم الديرة مابها حرب يا خي ,,,, و ذولا بنات ناس مو يعني بنات الرجال يصبرون نقوم ندعس عليهم ؟؟!!!!!! عشان هالاسباب يبون يتطمنون على بناتهم و ما يزوجون خير شر !!



و الله يشهد علي باليلة الجمعه الكريمة ان الكلام اللي كتبته صار و الله صار ,,, نعم بنات حمايل بنات شيوخ من شيوخ نجد تزوجوا رعاة غنم ,,, و مصلحين تلفزيونات ,,,, و موظفين شركات ,,, و عاطلين عن العمل ,,,, و غيره !!!

وين اللي يقول صعب !!! و شا يفين انفسهم ؟؟؟؟؟؟؟؟؟؟

الا وين بيوت عنيزة اللي تقول مافي وريني اياهم بشوفهم !! بتعرف عليهم !!!! و بعدين بنات بريدة بنات حمايل !!! اكبر بيوت الحمايل فيها !!! و بنت الحمايل تطلع كذا من بيت أهلها ؟!! ايزي حط اي تكاليف و تعال تزوج !!!! ايا كنت ؟؟ حتى لو انك منت من القصيم ( لأن اللي مو من القصيم ولا هو من الجماعه كلش ماندري عنه و لا نعرفه .... و طبعا وشلون بنسأل عنه و نعرف انه قدها ؟!!) و القصيم كلها تتشابة !!

الله اكبر ... الحين الرس غير بريدة غير عنيزة غير ... !!! و هي كلها منطقة وحدة !!! القصيم منطقة وحدة صغيرة اميرها واحد !!!!!!!!! و عاداتهم كلها وحدة !!!خبري بهم كذا كان تغيروا مدري!!

عاااااااد ما اكذبك يا اخوي بس شكل اللي قالك السالفة كذاب الظاهر !!!!!!


أرجوك

لا تزعل مني !!

يمكن أحتديت شوي عليك و أنا أختك يمكن رويت القصة بشيء من ..... الصراحة الجارحة

يمكن عفست الدنيا و قلت أشياء ,,, مو لازم أقولها !!!! لكن ,,, كلمات بنفسي بقولها و بنقلها لغيري

بس شفت ... و سمعت .... و عايشت و استنكرت اللي قريته !!

ولا تزعل ابد ابد لاتزعل مني بس صدقني أشوف شي يمكن انت ما شفته

شفت اشياء و شفت بنات ناس منظلمين منقهرين حرام كذا يا مسلمين !!

ان كان بكلامي غلط قولي غلط و ان كان صح قول كلمة الحق

و ان كان خويك شاف كذا صدق عاد الله اعلم

لكن يجيك العلم مني مو من غيري

الكلام اللي انا قريته ما فيه شي صحيح و انا اختك و الله مابه شي صحيح !!

و على العموم ..... حنا أهل تحت راية لا اله الا الله و حكامنا آل سعود جزاهم الله عن المسلمين خير الجزاء

و الكلام هذا مجرد آراء و كل واحد يشوف له من جماعته اريح له ان بغيت رأيي !!!


و حنا اخوان و الزعل مرفوع و الف شكر للمنتدى الرائع اللي يعرض الآراء و الاختلافات بيننا و نناقشها بأسلوب سليم

شكرا على طرحك الطيب

ربما يكون لي رجعه تعبت من استحضار الذكريات !!

[فهد الراجحي]

شكرا ً للجميع على آرائهم حول الموضوع أشكركم من كل قلبي

وأتمنى أن لا يكون الموضوع سبب فجوة بيني وبين بعض الأعضاء لكن يعلم الله

أنني لم أكتب هذا الموضوع إلا ّ لمعرفة ما يدور خلف كواليس الزواجات والخطوبة

وأخيرا ً وليس آخرا ً : ــ ( إختلاف الرأي لا يفسد للود قضية )


كلمة أخير لهواي نجدي : ــ تقول في إحدى ردودك : ــ

الا شف من عايلتك أنت !!
ــــــــــــــــــــــــــــــــــــــــــــــــــــــــــــــــــــــــــ

( عزيزي هواي نجدي اليتيم يواجه صعوبات في الخطبة والزواج هل فهمت ما أقصده ؟ )




وشكرا ً للجميع

أخوكم ( الأسد ) النمر الأسود سابقا ً