كمبيوتري شكله بينتحر .. الحقون [الأرشيف]

عاشقة الجنة

30-08-2006, 07:22 AM

بسم الله الرحمن الرحيم ..
السلام عليكم ورحمة الله وبركاته ..

شكل هالقسم مهوب خالص من طلباتي :p
بس وش أسوّي عليميه بعيد عنكم :(

جهازي يطلّع لي مربع يقول إن الذاكرة امتلت ..
ومدري وش الذاكرة الظاهريه :confused:
وقعد يخربط عليّ :eek:

اللي فهمته أنه يقول ارحمين من قراشيعتس ما هنا مكانن بي لشيء جديد :D
وبصراحه بعذره ما بقى شيء ما حطيته بوه :(

الزبدة :
وش السواة الحين ؟؟!

مفكرة اشتري سيديات وأفرّغ اللي بجهازي بهن ثمن أمسحهن من الجهاز :(
بس هل هذا يكفي ؟؟! والا هنا شي ثاني أسوّيه ؟؟!

هذا وأفيدكم علماً إني كمبيوتري صاير يعلّق معي كثير ..
ويغثّ واجد مهوب زي اول << كثّر خيره يوم استحملتس :p

شموخ الله يخلّيتس ولا يهونون الباقين ..
ساعدوني بسرعة أخاف ينفجر الجهاز من اللي بوه :(

جزاكم الله خير مقدماً ..
ولا حرمكم الله الجنّة :)

*

*

بما إني حطيت موضوع حطيت لي طلب ثاني << عدّلت عشان ما أسوي موضوع جديد :)

أبغى البرنامج اللي يحفظ التحميل بعد انقطاع الاتصال ..
بحيث اني إذا رجعت أحمّل بعد ما أسكّر النت ما أحمّل من الأول أحمّل من اللي وصّل له التحميل آخر شيء ..

هذا والله يسعد يارب كل من يساعدن ..
ويوفقه دنيا وآخره .. ويفتحها بوجهه وين ما راح ..
ويحقق له كل أمنياته .. ويدخله جنات النعيم ..
اللهم آمييييييين ..

لا حرمتم الجنة :)

شمـ بريدة ـوخ

30-08-2006, 07:51 AM

وعليكم السلام والرحمه

طبعا الجهاز يعلق بسبب ان القرص مليان... يعني لتفادي التعليق لازم نخلي ربع القرص تقريبا فارغه

طيب كم قرص عندتس ...؟؟؟؟

.

عاشقة الجنة

30-08-2006, 08:02 AM

شموخ تكفين حبه حبه ..
وشلون كم قرص عندتس ؟؟! :confused:
تراي عليميّة والله :D

ما عليه فهمين :o

شكل ليلي طويل :(
بس يالله تحمّلين ولتس الأجر إن شاء الله :)

وجزاتس الله خير على المسارعة في تلبية الطلب ..
وبانتظار ترجمة ما قلته :p

لا حرمك الله الجنة :)

شمـ بريدة ـوخ

30-08-2006, 08:16 AM

:D

طيب
اضغطي على جهاز الكمبيوتر الموجود على سطح المكتب ... راح يطلع لتس مثل هالصورة

http://www.alqosman.net/vb/uploaded/18_1156914961.gif

انا عندي ثلاث اقراص مثل ماهو موضح لتس بالصورة... انتي كم واحد عندتس :D

.

عاشقة الجنة

30-08-2006, 08:25 AM

يوم حطيت ردي الأول تنبهت للي قلتي ..
ورحت لجهاز الكمبيوتر وشفت ..
وجيت باقولتس كانتس تقصدين ذا ترى عندي اثنين ..
بس خفت ما يطلع هو وأتفشل :D
أثري الحين تفشلت :D بس يالله نتعلّم :p

عندي اثنين بس ..
لكن غريبه ليه اثنين عندي وأنت 3 ؟؟! << غارت :p

القرص سي يقول مخفي ولا تتعبثين بوه ..
والقرص دي بوه ملف ما اذكر قد حطتيه بوه اسمه : Arabic Type << هو اللي حاطّه والا وش السالفة ؟؟!

والله يا أنا بجد عليمية :o
بس أنت معلّمتي ( بارجع لابتدائي :D ) ..

بانتظارك :)

لا حرمك الله الجنة :)

شمـ بريدة ـوخ

30-08-2006, 08:41 AM

طيب حلو

الحين حاولي انتس تشيلين بعض الملفات او الصور المخزنه عندتس بالمستندات مثلا وانقليهن للقرص دي
طبعا قص لصق .. مب نسخ

بكذا راح تخففين على القرص سي
.

شمـ بريدة ـوخ

30-08-2006, 08:47 AM

قبل ماتسويين الطريقه الي قلتلتس

ابيتس تجيبين لي صوره لحجم القرص سي والحجم للقرص دي
يعني اضغطي بزر الماوس الايمن على القرص ثم اختاري خصائص .. صوري لي الدائره الموجوده بكل قرص <<< حتى نوريتس الفرق 8__8

.

عاشقة الجنة

30-08-2006, 08:47 AM

يعني ما أحذفهن بتاتاً ..
ولا أكلّف على نفسي وأحطهن بسيدي ؟؟!
وهل بالطريقة هذي بيخف التعليق اللي مشغلن له كم يوم ؟؟!

بعدين عندي سؤال :
فيه عندي ملفات تكون مكرره ..
بيعني محطوطه مرة بمكان ومره بمكان ثاني بالقرص سي ..
هل يحسب مساحة اثنين بالقرص ؟؟!
أو مساحة واحد لأنها نفس الشيء ؟؟!

لا حرمك الله الجنة :)

شمـ بريدة ـوخ

30-08-2006, 09:01 AM

بما انه عندتس قرصين مب لازم تحفظينهن بسي دي
انتي حاليا تستخدمين القرص سي عشان كذا هو مليان اما قرص دي فاضي
لما ننقل ملفات للقرص دي راح يخف الضغط على شي وبكذا راح يقل التعليق

ولكن يفضل ان الملفات الي ماتبينهن تحذفينهن تماما

واما الملفات المكرره طبعا يحسب مساحة اثنين .. لذالك اي ملف مكرر احذفيه

وشي ثاني للحفظ بقرص سي دي لازم يكون عندتس سدرايتر عشان تقدرين تنسخين عليهن ...
.

عاشقة الجنة

30-08-2006, 09:05 AM

الله مير يشرّفتس بإعطائتس صحيفتس بيمنتس يارب :)

هذي الصورة اللي طلبتي :

http://www.i1i2.com/upload/ca96d79979.bmp

ما حمله القصمان لكبره ومير أروح لمركز تحميل النورس اللي برفع الصور وجبته :)

بس شموخ ما عرفت أوخّر الخلفية السوداء ذي وأخليه مربع زيّتس يوم تسوين صورة القرص المحلّي ..

ما شرحتوا هالنقطة بموضوع الصور حق تويكس عشان كذا ما فهمت .. حاولت بس مدري شلون :(
<<< أبي شرح ذي لا هنت بعد إذا فضيتي << صدق منب أستحي من الطلبات :D

الحين نرجع لموضوعنا الأصلي :p

هذي سعة الذاكرتين .. توّي أنتبه للفارق الشاسع اللي بينهم تصدقين :eek:

بانتظارك ..
لا حرمك الله الجنة :)

عاشقة الجنة

30-08-2006, 09:12 AM

واما الملفات المكرره طبعا يحسب مساحة اثنين .. لذالك اي ملف مكرر احذفيه

الملفات الي ماتبينهن تحذفينهن تماما

ابشري إن شاء الله :)

وشي ثاني للحفظ بقرص سي دي لازم يكون عندتس سدرايتر عشان تقدرين تنسخين عليهن ...

إيه عندي سيدي رايتر :)

الله يجزاتس خير يارب لحلّتس ..
ولسرعتس بالجواب << عشان كذا أتطلب هنا واسفه المواقع الثانية :)

الله يوفقتس يارب ويسخّر لتس ..
ويفتح لتس أبواب رزقه ..
ويفرّج عنتس كل همومتس ..
ولا يحرمتس الجنة :)

شمـ بريدة ـوخ

30-08-2006, 09:31 AM

شوفي القرص سي مابه مساحه فاضيه سوى 9 غ.ب فقط
اما دي كله فاضي

خلاص انلقي الملفات لدي حتى تخففين على شي

وبعد فيه نقطه مهمه وهي انه لازم تسوين افراغ لست المحذوفات بين كل فتره وفتره لان الي بالسله ياخذن حيز من القرص

ولازم تسوين تنظيف للقرص
بتقولين شلوزن اقولتس شلون << ضامنه خخخخخ :D

تضغطين على القرص سي بالزر الماوس الايمن ثم تختارين خصائص
راح يطلع لتس نافذه اختاري ( تنظيف القرص )

http://www.alqosman.net/vb/uploaded/18_1156919234.gif

راح يطلع لتس مثل هذا

http://www.alqosman.net/vb/uploaded/18_1156919262.gif

حطي علامة صح على كلا من
ملفات انترنت مؤقته - و سلة المحذوفات - و ملفات مؤقته -
ثم موافق
راح يطلب التاكيد قولي نعم
اصبري لمين يقضي منظف
وهالطريقه تشيل الملفات الخرابيط :D عشان يخلي مساحه بالقرص

.

ياسر

30-08-2006, 09:38 AM

يامال العافية ياشخموطة
طيب انا عندي حل ثاني ....اشري لتس هارد ديسك خارجي يا عاشقة الجنة وانقلي بوه كل الاشياء اللي ماتبينهن بوقتهن ... تراه أمر مناسب تاخذين 60 قيقا تقريبا ب 350 ريال
شي حلو ...ويحفظ العمل ولا تحتاجين لسي دي رايترات

حلم العالم

30-08-2006, 10:30 AM

هذآ برنآمج الـ get right للتحميل من الإنترنت حيث يمكن موآصلة التحميل بعد الإتصآل بالأنترنت عند انقطآع الإتصآل ..

حمّــــل هنــــآ (http://www.get-right.com/getrt45d.exe)

ولمزيد من الشرح والتفآصيل حول هذآ البرنآمج اضغـــط هنـــآ (http://www.zajildot.com/forum/lofiversion/index.php/t1965.html)

لأنّه رآح يطلب منك الكرآك ، وكل شي موجود بالتفآصيل اللي رآح تضغطين عليهآ فوق:)

وبالنسبة للتخفيف على الجهآز مثل مآقآلت شموخ ممكن تقصّين الملفّآت من السي وتلصقينهآ بالدي لأن الدي عندك فآضي مآله شغل ولآ مشغله :D ، ويآحيل الله السي متحمّل الكلآفه كلّه يكفيه شآيلن الوندوز:D

وبرضوه كلآم يآسر ممتآز وهو اللي أكثر النآس يسوونه ، هآرد ديسك خآرجي والحين صآر الـ 80 قيقآ بـ360 ريآل ، والـ 100 قيقآ 548 ريآل بمكتبة جرير :)

رسـّــــاوي

30-08-2006, 03:04 PM

الذاكرة الظاهرية .. ما لها علاقة بالقرص الصلب ...

ومثل ماهو واضح فوق ... القرص الصلب عندك مهب مزحوم

الذاكرة الظاهرية هي الـ Virtual Memeory ........... لها علاقة بالرام RAM

اكيد الرام عندك منخفض .. 128 مثلا ... وهذا اللي يسبب ثقل الجهاز\

علشان تتأكدين من الرام .... قومي بالتالي .. وعلمينا كم الرقم

لوحة التحكم >> خصائص النظام ............................. أو (النظام)

تحت (عام) .. تلقين في الأخير كم الرام عندك

ننتظر جوابك

شمـ بريدة ـوخ

31-08-2006, 03:03 AM

8
8
الذاكره الظاهريه موجوده على القرص الصلب وهذي المنطقه تسمى page file وهي التي تحفظ صفحات من الرام على القرص الصلب

فإذا كان يستخدم برامج او ملفات تلتهم الذاكره فهالشي راح يبطيء الاداء
يعني ممكن ان حجم الذاكره الرام مايكفي لتشغيل مجموعه من البرامج بوقت واحد .... فإذا وجدت الذاكره الظاهريه راح يقوم الكمبيوتر بالبحث عن أجزاء غير مستعملة باستمرار من الذاكرة الرام ويقوم بنسخها على القرص الصلب و هذا يحرر قسما من الذاكرة الرام ليتم استخدامه في تشغيل التطبيقات الإضافية

لذالك يتم تفريغ جزء من القرص الصلب احتياط لتلك العمليه .. لتفادي البطء عند فتح مجموعه من البرامج

يارب اني قدرت اوصل المعلومه :)

.

عاشقة الجنة

31-08-2006, 03:46 AM

شموخ أبشرتس سوّيت تنظيف القرص زي ما قلتي ..
وأشوى إنتس علمتين شرحه << على قولتس ضامنة إني بأقول وشلون :D
أخبر بنت خالتي قايلتن لي شيء عنه من زمان بس ما اهتميت << ما درت إنه بتصير له هالهوايل اللي الحين :D

وتو قصّيت أشياء من السي وحطيتها في الدي ..

طلع السي المساحة الحرّة اللي فيه حالياً 11,4
أما الدي فالمساحة الحرّة اللي فيه 16,2

أخفّف أكثر من السي والا لا ؟؟!

اكبر ملف هو اللي شلته منه تو ..
بس يمكن عشانه شايل الوندوز على قولة أخوي حلم العالم << وتوني أدري عنه ذي << عليمية بجد :D

الله يخلّيتس يارب ويوفقتس ..
وقسم بالله ما أطلع من جزاتس ..
لكن كل اللي أقوله الله يرفع درجاتس يارب بالجنة :)

عاشقة الجنة

31-08-2006, 04:06 AM

اشري لتس هارد ديسك خارجي يا عاشقة الجنة وانقلي بوه كل الاشياء اللي ماتبينهن بوقتهن ... تراه أمر مناسب تاخذين 60 قيقا تقريبا ب 350 ريال
شي حلو ...ويحفظ العمل ولا تحتاجين لسي دي رايترات

هذا أحسن حل ..
لأن عندي كمبيوترين واحد لاب توب والثاني مكتبي ..
والمكتبي للأسف ما فيه سيدي رايتر وما أقدر استفيد من الملفات اللي فيه ..
شريت موموري يمكن بـ 350 ريال .. بسعة 1G
المهم أول شيء شغّالة تمام لكن ما قعدت اسبوع إلا مدري وش صار فيها ..
صرت لمّا أحفظ فيها أشياء من كمبيوتر وأروح أستخدمها بكمبيوتر ثاني تطلّع لي الملف ولمّا أفتح ما ألقى فيه شيء .. أو ألقاه بس يقول طريقة الحفظ خطأ أو شيء زي كذا ..
ولمّا أجي امسح هالغلط ما يمسح .. زهقت منه ومير أرميه وهذاه عندي بدون فايدة ..
أدري إن الغلط باستخدامي بس ما عرفت وش اللي غلطت فيه ..
ولا أدري هل أقدر اصلّحها أو لا ..
واللي يقهر لمّا يعطوني صديقاتي الموموري حقهم أسوّي كل شيء مضبوط بس حقتي لا .. يمكن طريقة استخدامي لحقتهم تصير صح بس أنا لمّا استخدمها لنفسي تصير غلط .. مدري ..
واخاف أشتري الهاردسك الخارجي هذا ويصير لي مثل الموموري :(

اللي يفيدني باللي قلته تو اللي يعطيه العافية ويفرج له ..
لأني بجد عليمية وخبّصت الدنيا :(

عموماً أخوي ياسر جزاك الله خير لمرورك واقتراحك ..
والله يفرّج لك همومك يارب .. ويصلحلك دينك ودنياك ..

لا حرمك الله الجنة ..

شمـ بريدة ـوخ

31-08-2006, 04:14 AM

:)

طيب لاحظتي انه خف التعليق ولى كماهو ماتغير شي

أخفّف أكثر من السي والا لا ؟؟!

حاولي تخففين بقدر المستطاع افضل ..

.

عاشقة الجنة

31-08-2006, 04:19 AM

هذآ برنآمج الـ get right للتحميل من الإنترنت حيث يمكن موآصلة التحميل بعد الإتصآل بالأنترنت عند انقطآع الإتصآل ..

شكل البرنامج حوسته كثيرة ..
بس بإذن الله بحاول فيه على الخطوات اللي بالرابط وإذا ما عرفت مالي إلا الله ثم هالقسم وبأسال عنه ..

بالنسبة للتخفيف على السي خفّفت الحين وصارت المساحة الحرّة 11,4و مدري هل أخفف أكثر والا لا ؟؟!

أما بالنسبة للهاردسك الخارجي فياليت تراجع ردّي على اخوي ياسر وتفيدني كان عندك علم ..

جزاك الله خير على مساعدتك ..
والله يفرّج لك بالدنيا والآخرة ..
ويسخّر لك أهل السما والأرض ..

لا حرمك الله الجنة ..

عاشقة الجنة

31-08-2006, 04:31 AM

علشان تتأكدين من الرام .... قومي بالتالي .. وعلمينا كم الرقم

الصراحة كلامك وكلام شموخ ما عرفت له ..
فهمت بس أنه في شيء يقوم بتفريغ الثقل اللي فيه عشان يخليه يشغّل أشياء ثانية ..
بس الرام والذاكرة الظاهرية والخرابيط الثانية ما فهمتها ..

استخدامي بالكمبيوتر ما يتعدى الأشياء اللي أحتاجه فيها ومن هنا صرت مدري وش السالفة لأني ما استكشفت فيه ولا دخلت دورات للأسف ..

عموماً سوّيت زي ما طلبت وطلع لي هالرقم : 265 م.ب من رام

جزاك الله خير على مرورك ومساعدتك ..
والله يفتحها بوجهك وين ما رحت ..
ويصلح لك النيّة والذرية ..

لا حرمك الله الجنة ..

عاشقة الجنة

31-08-2006, 04:42 AM

طيب لاحظتي انه خف التعليق ولى كماهو ماتغير شي

مدري توني شايله الملف .. ومن شلته جيت لهالموضوع على طول ..
بس تو حاولت أفتح صفحات بالنت وأشياء بكمبيوتري وأحس أنه أحسن من قبل ..

وبإذن الله بحاول قد مقدر أخفف ..
وأفكر أشتري الهاردسك الخارجي اللي قالوا عنه بأقرب وقت ..

والله لا يحرمتس يارب ما دعيت لتس ..
وسامحينا على المغثّة اللي شكله مهب خالصه أبد :)

الله يوفقتس دنيا وآخرة يارب ..
ويرزقتس الصالح من خلقه ..
ويجعلتس ما تحتاجين لحد أبد ..

لا حرمك الله الجنة ..

شمـ بريدة ـوخ

31-08-2006, 05:01 AM

8
8
على الرحب والسعه :)

الي نعرفه بنشارك فيه والي مانعرفه عاد الشكوى لله والعذر والسموحه على التقصير

ومانبي غير الدعوات الصالحه فقط :)

جزيتي خيرا على لسانك الرطب
واذا فيه شي عندتس بعد حنا بالخدمه
.

رسـّــــاوي

31-08-2006, 01:56 PM

عاشقة الجنة

31-08-2006, 07:52 PM

شموخ الله يسلمتس يارب :)

وإذا على الأشياء عندي كثير بس شوي شوي عشان ما نثقّل عليكم :)

الله لا يحرمك الجنة يارب :)

*
*

أخوي رسّاوي كيف أرفّع الرام طيب ؟؟!

وجزاك الله خير مقدماً ..
ولا حرمك الجنة ..

رسـّــــاوي

02-09-2006, 04:38 PM

أخوي رسّاوي كيف أرفّع الرام طيب ؟؟!

وجزاك الله خير مقدماً ..
ولا حرمك الجنة ..

أبد خوذي لجهاز لمحل كمبيوتر تثقين بهم .. وخليهم يزيدون الرام ...........

طبعا الحين عندك 256 ... ارفعيه الى 512 ..................... طبعا قد يكون كمبيوترك (ان كانه قديم) ما يقبل الترقية .. في هالحالة تحمليه والله يعينك :)

رسـّــــاوي

02-09-2006, 04:41 PM

لي رجعة ببعض معلومات بخصوص الذاكرة الظاهرية بس مشغول هاليومين شوي

رايقة

02-09-2006, 05:18 PM

عندي مداخله بسيطه وهو ان الميوري اللي اني شريتي مره غالي
وش ماركته؟؟
انا شاريه هاردسك خارجي 100 قيقا ب500ريال
وماشي معي تمام
وعندي ثنين صغار1 قيقا
والثاني
512
والله يكون بعونك ياعاشقة الجنه

رسـّــــاوي

03-09-2006, 08:46 AM

بالنسبة للذاكرة الظاهرية .....................

يمكن الحجم المخصص لها في جهازك قليل

جربي التالي ..

لوحة التحكم Control Panel > النظام System > خيارات متقدمة Advanced

تلقين في الصفحة ثلاث أزرار (إعدادت Settings) ......... أول واحد موجود تحت (الآداء Performence) .. اضغطي على هذا الأول ..

يفتح لك نافذة جديدة ... روحي فيها بعد لـ (خيارات متقدمة Advanced)

تلقين في أسفل النافذة اعدادات الذاكرة الظاهرية ... وفيه زر مكتوب عليه (تعديل/تغيير Change) .. اضغطي عليه ليفتح لك النافذة التالية

http://www.alqosman.net/vb/uploaded/40_1157262021.gif

آخر سطر فيه المساحة الخصصة .. واللي فوقه يعطي المقترحة أو المثالية ... المفروض يكونن نفس الشي ... أو على الأقل المخصص أعلى من المقترح ................ طيب اذا كان المخصص أقل من المقترح عدليه من الخانة المخصصة أعلاه ليصبح نفس المقترح ... واذا كان نفس الشي .. بامكانك رفع المخصص شوي .. الى 900 مثلا

اذا تلخبطتي في أي خطوة والا شكيتي بشي ... حطي (إلغاء Cancel)

تحياتي

عاشقة الجنة

04-09-2006, 09:46 PM

جود والله مدري << عليميه بهالأشياء خخخخ ..
لكن ماركتها سوني ..
وآمين الله يعني ويثقفني بهالأمور :)
تشكرات على مرورك ودعائك ..
وإن شاء الله أشتري الهاردسك الخارجي ..
لا حرمت الجنة :)

*
*

أخوي رساوي جزاك الله خير ما قصّرت ..
للأسف اللاب توب مو موجود عندي هالفترة ..
لكن بإذن الله اذا رجع راح أسوّي اللي قلت ..

الله يوفقك يارب .. ويسخّر لك ..
ولا يحرمك الجنة ..