ابي اعدل بين عيالي وش الحل ؟

[عووووويس]

السلام عليكم ورحمة الله وبركاتة :)

صبحكم الله بالخير وسعة الرزق ;)

هذا مجلس الاسرة والطفل ====> عندى مشكلة اسرية تخصني ودي القى لها حل عند الاختصاصيين اللي عندكم :D


بسم الله نسرد مشكلتي :D

الحمد لله رب العالمين الله رزقني بطفلين واحد صبي عمرة ثلاث سنين والثاني بنية الله يصلحها ويزوجها عمرها سبع شهور :(

مشكلتي اني احب البنية اكثر من ولدي :(

ودوم اهاوش الولد اذا طقها ولا لعب معها :(

مع العلم ان طول وقتي مع البنية العب معها واكلها ===> صافط الولد معطيه الخامس :D


والله ان ضميري يئنبني واحن علية :(

بس الشكوى لله وش اسوي القلب مايل :(

مع العلم انه قبل لا تجي البنت كنت طاير بالولد وما بعده غالي :(

سبحان مغير القلوب :(

والله عجزت اعدل بينهم حاولت اكثر من مرة :(

عطوني حل :o

[هواي نجدي]

لالالالالالالالالالالالالالالالا

مالك حق

الولد ترا اجمل شي بحياته ابوة و البنت بعد


ما يخالف لا قعدتهم بينك و سولفت معهم






شف اعرف القلب مايل

لا نام الولد زم بنتك و العب معه اليييييييييييييييييييين تقول امين




بس كذا حرام

ترا يكبون و تصير عداوة


حطهم جنب بعض اعطي كل واحد اللعبة اللي يبيها

خذ ببالك ان الولد عمرة 3 سنين !! يفهم يا قلبي عليه !!! و ينكسر خاطرة

بس حببه بأخيته خله ينتبه لها مثلا

يعلمه الرسم <<<<<<<أدري هو ماتعلم بس عطة قلم خل يرسم قدام اخته <<<<<< عساس يصير يحبها و هي تحبه


امسكة شوي لا مل منك شيل البنت



هذا اللي عندي و انا ماعندي خبرة بالبزران توي ما اعرست بس اشوف الناس

و ما أقول الا الله يخليهم لك و يزيدهم ان شاء الله و يصيرون عييلك وااااااااااااااااااااااجد و كلهم صالحين حافظين للقرآن

اللي اعرفة

لازم تحافظ على هدوء بيتك انت و زوجتك لأنه لا صار بينكم محبة و مودة انعكس على الأطفال و على نفسيتهم



دعواتي لك بالتوفيق و السعادة

[حلم العالم]

عويس :D ،، من الطبيعي أن الطفل إذآ كآن بمثل هالسن 7 شهور يكون هو المدلّل المحبوب مقآرنة بأبو 3 سنوآت ، وهذآ طبع ابن آدم يطف بالولد الأول لين يوصل لمرحلة معيّنه يخف معهآ مرحلة التدليع أو إذآ جآله أخو انتقل الدلع للجديد

لكن نصيحة يآعويس انتبه تدلّع الصغير قدّآم الكبير!! أو أنّك تضحك معه وتهمّش الكبير لأن هالشيء يسبّب حزآزيّآت لآتحمد عقبآهآ

وأنت حآول تعدل بينهم هذآ أهم شيء وإن شآء الله يرزقك ربي بكومة عيآل وتنتقل الملكيّة من وآحد لوآحد لين تحبّهم كلّهم أو تكرههم كلّهم:D

الله يخلّيهم لك ، ويصلح لك النيّة والذريّة ويجعلهم عطاً صآلح يآرب .. :)

[ذكرى]

هذي يسمونه الطفع يعني عادي

بس لا ضرر ولا ضرار

يعني مثل ماقالو لا تبين للولد

لو حاول تحسسه انه هو رجل وهي توه صغيرة وانك تشفق عليها لا اكثر ولا ترا بيحقد على اخته

[عيـون * الفجـر]

حسسه إنه كبير وإن أخته الي أصغر منه محتاجته
وإنه لازم ينتبه له وعودة يتحمل مسؤولية لو بسيطة

وأنت لاتحاول تدلل الصغيره قدامه
يعني الكبير إذا دللت الي أصغر منه قدامه يغار أحيانا
فما بالك بواحد صغير عمره 3 سنوات ..

حاول تشاركه باللعب مع الصغيره

ولاتلومه لو ضربه ولا سوا له شي لأنه يشوفه المدله وهو معطينه ركبة

عاد ترا ماعندي سالفة بس من باب المشاركة الوجدانية ..

الله يصلح لك عيالك
ويرزقك برهم

[جلنار]

اسمح لي على التاخير ...
بما اني اعيش تجربتك ... احس اني اكثر وحدة فاهمة شعوووووورك....
بالنسبه ..انك تغلي البنت اكثر ..<< لاتلوم نفسك.... كثير مثلك الثاني يصير اغلى من الاول ..
نجي للحل ...
معليش حاول تضغط على نفسك ولا تلعب البنت قدامه ابد... الا اذا كا ن غافل عنك بلعبه له او شي...
وحاول في وقت جلوسك .. انك توسع الصدر معه وتحاول تلعب معة ...
<< برايي الاطفال بهالسن يحبون اللعب مع الاب .. لعبة << قيس قم << كان تعرفها مادري تستخدمون اللفظ هذا..
<< النقطة الاهم اذا ضربها .. حاولو انت وامه تتجاهلون ولاتلومونه ... لانه اذا شاف مافي فايدة
من لفت الانتباه ترك ضربها ...
وانا هذي طبقتها ونجحت معي ...
واخيرا ..
الله يخليهم لك ...ويصلحهم ويرزقك برهم ..